A Dirección Xeral de Planificación e Avaliación da Rede Ferroviaria do Ministerio de Transportes, Mobilidade e Axenda Urbana (Mitma) fixo pública unha modificación dos prazos no proceso de licitación do estudo informativo do saída sur ferroviaria de Vigo (a que converterá a estación olívica en pasante e permitirá a conexión de alta velocidade coa fronteira portuguesa) que supón pospor varias semanas as datas inicialmente previstas.
Así, o prazo de obtención de pregos pasa de acabar o 27 de xaneiro de 2023 ao 14 de marzo, e tamén se atrasa seis semanas, ata o 15 de marzo, o prazo de presentación de ofertas. Do mesmo xeito, a data de apertura das ofertas económicas atrásase ao 13 de abril.
Segundo fontes do Ministerio consultadas por Europa Press estas modificacións, que son “habituais” nos procesos de contratación, “non afectan á planificación” e responden á petición dos licitadores para que se achegase documentación adicional.
Con estes cambios de data, engadiron as mesmas fontes, preténdese dar máis tempo aos ofertantes, coa maior información posible, para evitar futuras impugnacións ou recursos, “que si poderían atrasar a planificación”. O contrato para a elaboración do estudo ten un importe de algo máis dun millón de euros e un prazo de execución de 18 meses.
