O sindicato CIG gañou as eleccións sindicais celebradas na empresa tecnolóxica galega Altia, no seu centro de traballo de Vigo, o ‘Data Center’ da compañía.

Segundo informou a CIG nun comunicado, a pesar da situación actual de teletraballo, a participación dos empregados no proceso electoral foi superior ao 70%.

Tal e como sinalou a CIG, tratábase da primeira vez que o sindicato presentaba unha lista no centro de traballo vigués, eleccións na que o sindicato logrou conseguir tres dos cinco representantes do comité do ‘Data Center’ de Altia.

Desde a CIG, mostráronse “satisfeitos” polos resultados conseguidos. “Isto permite comezar forte cun traballo a favor do conxunto dos traballadores, pola mellora das condicións laborais e na loita por unha igualdade real de oportunidades”, declararon desde o sindicato.

“Existe unha sección sindical con ganas de facer cousas e darlle un impulso á actividade sindical no centro de traballo. Tamén esperamos que isto se contaxie a outros centros de traballo de Altia como os que a compañía ten na Coruña e en Santiago de Compostela”, din desde a CIG.