O alcalde de Vigo, Abel Caballero, fixo este xoves, durante a súa rolda de prensa diaria, o balance dun ano que considera “histórico” para a cidade olívica. O rexedor vigués destacou a “trasformación” que está a vivir a cidade grazas ás 229 obras que se están acometendo por valor de 218 millóns.

“Aprobamos no orzamento do ano 2022 un total de 27 obras por valor de 100 millóns de euros. No mes de febreiro fixemos unha ampliación con 65 obras e 45,8 millóns de euros e o pasado mes de novembro volvemos ampliar con 38 obras e 32,8 millóns de euros. Ademais, acabamos de aprobar un orzamento con 63 obras e 33,8 millóns de euros, sen esquecer a aprobación de forma singularizada de 36 humanizacións no rural vigués por valor de 6,5 millóns de euros”, sinalou.

Caballero destacou obras como as que se realizaron na Porta do Sol, a Vía Verde, o paseo de Bouzas, as ramplas de Gran Vía e a Praza Elíptica, entre outras. “Nunca na historia desta cidade sucedeu nada nin sequera parecido”, asegurou.

O alcalde de Vigo tamén valorou positivamente a actuación do goberno local noutras cuestións como a cultura, o deporte, a educación, a economía e o turismo, que experimentou un gran repunte nos últimos días grazas ás luces de Nadal, que “puxeron a Vigo no mapa”.

Así mesmo, Abel Caballero quixo agradecer o “importante apoio” do Goberno de España e a Deputación de Pontevedra, que permitiu sacar adiante numerosas actuacións e actividades, non sen antes cuestionar o papel da Xunta de Galicia en Vigo.