A Consellería de Infraestruturas e Mobilidade adxudicou por uns 14,3 millóns de euros as obras do novo centro integral de saúde Olimpia Valencia de Vigo. Segundo informou a Xunta de Galicia nun comunicado, as actuacións, que teñen un prazo de execución de 18 meses, consistirán na execución dun novo centro de saúde que ocupará o espazo do actual edificio da Audiencia Provincial situado na rúa Lalín.

Así, o novo centro integral de saúde situarase nas proximidades da praza de América, entre os barrios das Travesas e Coia. A Xunta anunciou que as obras se iniciarán cando conclúa o traslado dos servizos e do persoal da Audiencia Provincial á Cidade da Xustiza de Vigo.

Desde o Goberno galego ven o novo centro integral de saúde como “unha oportunidade de mellora dos servizos sanitarios da cidade”. “Unificará a atención sanitaria do barrio das Travesas e incrementará a carteira de servizos de atención primaria que se presta na actualidade. Así mesmo, dotará a esta zona daquelas prestacións que, actualmente, non están dispoñibles en ningún dos centros de saúde tales como fisioterapia, odontoloxía e farmacia”, asegurou a Administración autonómica.

Tal e como asegurou a Xunta, o futuro centro integral de saúde Olimpia Valencia de Vigo, que pretende substituír ao “obsoleto” centro de saúde de López Moura, beneficiará a unhas 42.000 persoas.