A Consellería do Medio Rural da Xunta de Galicia comunicou ao Ministerio de Agricultura, Pesca e Alimentación a detección dun exemplar de gaivota afectada pola gripe aviaria no Concello de Vigo.

O animal, segundo indicou o Goberno galego, presentaba sintomatología nerviosa e foi trasladado ao Centro de Recuperación de Fauna Silvestre de Carballedo, en Cerdedo-Cotobade. Alí extraéronse mostras e finalmente eliminouse o cadáver de acordo cos procedementos autorizados.

Con este novo foco son xa 25 en total os casos notificados en Galicia en aves silvestres. A nivel nacional, continúan aparecendo máis animais infectados, tanto aves migratorias como residentes e pertencentes a distintos hábitat e familias.

Este ano, un total de 13 das 17 comunidades autónomas notificaron algún caso de gripe aviaria en aves silvestres das que o alcatraz continúa sendo a especie máis frecuente.