O xa ex alcalde pedáneo de Bembrive, Marcos Castro, anunciou este xoves, tras a celebración dunha sesión extraordinaria da Entidade local Menor do devandito barrio vigués, a súa dimisión tras ser inhabilitado durante doce anos para exercer funcións públicas pola sección quinta da Audiencia Provincial de Pontevedra, con sede en Vigo.
O dirixente socialista, visiblemente emocionado e coa voz crebada, mostrou, na súa última sesión, o seu rexeitamento ao delito de prevaricación polo que se lle condenou. “Estou plenamente en desacordo coa sentenza ao considerala completamente desproporcionada e inxusta. Por iso, presentarei o correspondente recurso e irei ata as últimas consecuencias”, sinalou.
“A miña intención sempre foi, con maior ou menor fortuna, asegurar que en plena pandemia a Festa da Sidra tivese a continuidade que merece”, continuou. Castro declarou que “considera que non dar aos veciños a sidra que demandan, o dar outra distinta si que sería unha estafa ou mesmo podería ser unha malversación co diñeiro dos veciños”. “Iso xamais o faría. En ningún caso utilicei indebidamente nin me levei, nin tampouco hei malversado un só euro desta entidade”, asegurou.
“O meu único interese foi traballar para mellorar a miña parroquia, polo cal sinto orgulloso na miña xestión e voume coa cabeza ben alta e a miña conciencia ben tranquila”, relatou Castro, non sen antes agradecer, entre lagrimas, aos seus compañeiros o seu compromiso e apoio, aos cales desexou “a mellor das sortes”. Ademais, o dirixente socialista deu as grazas aos veciños que lle apoiaron. “Foi unha honra ser alcalde pedáneo de Bembrive”, sentenciou.
CAMBIOS NA ENTIDAD LOCAL MENOR DE BEMBRIVE
A dimisión de Marcos Castro abriu unha nova etapa na parroquia viguesa de Bembrive. O seu cargo, segundo informou a secretaria interventora da Entidade local Menor durante a sesión extraordinaria celebrada este xoves, será ocupado polo seguinte candidato do Partido Socialista (PSOE) con maior número de votos.
Así mesmo, a interventora destacou que xa se solicitou á Xunta Electoral Central “a expedición da credencial a favor do candidato seguinte da candidatura do PSOE” para coñecer a persoa que substituirá a Marcos Castro como alcalde pedáneo de Bembrive.
CRÍTICAS DO BNG
Por outra banda, o concelleiro e candidato á alcaldía de Vigo do Bloque Nacionalista Galego (BNG), Xabier Pérez Igrexas, sinalou que “a renuncia do alcalde pedáneo de Bembrive non é suficiente para pór fin a este escándalo”.
Ademais, Igrexas esixiu explicacións ao presidente do PSOE de Vigo, Abel Caballero, polo “escándalo sen precedentes” de que “os dous últimos alcaldes pedáneos do seu partido e designados e patrocinados por el” suman condenas xudiciais de 35 anos de inhabilitación e varios anos de prisión. “Bembrive e Vigo merecen moito máis”, sentenciou.
