Dúas persoas atracaron a punta de pistola unha oficina bancaria na tarde deste venres en Vigo deixando a tres empregados e a dous clientes coas mans atadas no seu interior.

Tal como informaron fontes da Policía Nacional, os feitos ocorreron á altura do número 377 da avenida do Aeroporto sobre as 14,30 horas deste venres, cando dous atracadores entraron na oficina de Abanca, maniantando os seus empregados e os clientes que naquel momento había dentro do local.

Un deles estaba armado cunha pistola, mentres que o outro portaba un coitelo. Tras facerse co diñeiro que había na caixa forte e no caixeiro, lograron saír do lugar.

Foron os propios empregados os que chamaron aos corpos de seguridade unha vez os ladróns xa se ausentaron do lugar.

Polo momento non se detivo nin indentificou ningún dos atracadores. Tamén se descoñece se fuxiron andando, nun coche ou se había máis cómplices no exterior do banco á espera.

As mesmas fontes explicaron que por agora tampouco se sabe a canto ascende o botín roubado, aínda que indicaron que podería alcanzar miles de euros. Unha patrulla da Policía Local tamén acudiu ao lugar en apoio á Policía Nacional.