O delegado do Estado no Consorcio Zona Franca de Vigo, David Regades, asegurou este xoves que os proxectos en marcha do organismo público crearán uns 3.000 empregos. Así o sinalou Regades durante a súa intervención como convidado o Xantar Tribuna organizado polo Círculo de Empresarios de Galicia, levado a cabo na cidade de Vigo.

Nel, o delegado fixo un balance da súa xestión, agora que a institución cumpre 75 anos de historia, cun investimento de máis de 55 millóns no últimos catro anos, pasando dunha cifra de negocio de 20,5 millóns en 2018 a 25,7 millóns en 2021.

“Cando cheguei ao Consorcio, nos polígonos estaban instaladas 660 empresas e hoxe son 705, 45 máis. O emprego alcanzaba as 17.569 persoas e hoxe son un milleiro máis, con 18.683 traballadores, e a facturación desas compañías pasou de 7.804 a 9.348 millóns de euros”, reivindicou Regades.

Entre os proxectos xeradores de emprego, destacou a posta en marcha da Plataforma Loxística Industrial de Salvaterra-As Neves (Plisan), onde xa se instalou a conserveira Albo con potencial de crear 500 postos de traballo, así como Beta Implants, que pasará de 29 a 200 traballadores, e a biofarmacéutica Lonza con 200 empregados.

“En total, na Plisan instalaranse de forma inmediata medio milleiro de traballadores, aínda que o potencial é doutros 500, cun compromiso de investimento destas empresas de 233 millóns”, subliñou.

David Regades agradeceu ao Círculo de Empresarios poder estar presente nesta Tribuna e puxo en valor a importancia da colaboración público-privada para xerar oportunidades e compartir ideas e opinións. Ademais, ofreceu o traballo da Zona Franca para todas aquelas empresas que necesiten un apoio do sector público.

Pola súa banda, o presidente do Círculo, Manuel Rodríguez, subliñou o papel de Regades á fronte de Zona Franca. “Está a marcar un fito, porque non só cumpre cos seus obxectivos en Vigo e a súa área económica, senón que busca en toda Galicia oportunidades e proxectos”, engadiu.

Ao xantar tamén acudiron diferentes representantes do mundo económico e político da Comunidade, como o delegado do Goberno en Galicia, José Miñones; o bispo de Tui-Vigo, Luís Quinteiro, ou o alcalde de Vigo, Abel Caballero.