A factoría viguesa da compañía automobilística Stellantis retomou este mércores a súa actividade tras o parón deste pasado martes pola falta de determinadas pezas e a pesar da “saturación de vehículos” aparcados en cámpalas de Bouzas e O Porriño á espera de que poidan partir cara aos mercados internacionais.
Tal como recoñeceron fontes da compañía consultadas por Europa Press, miles de coches producidos en Stellantis Vigo están en ditas terminais pendentes de ser transportados a outros países para ser comercializados.
Esta situación de “saturación de vehículos” é consecuencia da alteración dos fluxos marítimos pola actual conxuntura que viven os operadores loxísticos, que está provocada por varios factores que afectan á súa actividade.
Desde a firma indicaron que esta circunstancia non se produce só desde este martes, cando se desenvolveu unha folga intersindical en Francia, senón que xa vén rexistrando desde hai días e mesmo semanas.
Precisamente sobre este tema falou o presidente da Confederación de Empresarios de Pontevedra (CEP), Jorge Cebreiros, quen lamentou que á crise de compoñentes que sofre a automoción na actualidade hai que sumarlle os problemas loxísticos debido á situación actual en Francia, que impide que Stellantis Vigo poida exportar vehículos pola autoestrada do mar.
Na xornada ‘Tendencias e servizos do transporte ferroviario en Galicia’ organizada polo Clúster da Función Loxística de Galicia este mércores en Santiago de Compostela, Cebreiros puxo en valor a importancia de desenvolver as conexións ferroviarias necesarias para poder facer este transporte por tren.
Todo isto no medio dunha situación de crise vivida en Francia, tras unha manifestación multitudinaria en París polo aumento do custo da vida o domingo e unha folga intersindical desenvolvida este pasado martes que se une á folga nas refinarías do país, que está a deixar desde hai días problemas de abastecemento de combustible.
