Capitanía Marítima prevé deixar sen efecto este mércores a retención do mercante ‘Cool Girl’, de bandeira panameña, que permanece amarrado no peirao de Chapela, aínda que o barco será sancionado por incumprimento do protocolo MOU de París, ao levar exceso de pasaxeiros.

Fontes coñecedoras do procedemento, explicaron a Europa Press que na xornada deste mércores o barco deixa de estar retido, aínda que permanecerá en Chapela coa súa tripulación en cumprimento da escala que xa tiña prevista, e que durará ata o próximo 25 de setembro.

Por outra banda, os 20 pasaxeiros indonesios (a normativa permite, neste tipo de barcos, 12 pasaxeiros a parte da tripulación, e había 20 no barco) están a preparar a súa saída de España, en coordinación coas autoridades policiais e aduaneiras. Mentres, o ‘Cool Girl’ permanece no peirao de Chapela realizando labores de descarga de peixe e produtos do mar conxelados procedentes de Malvinas.