O comité de empresa de Vitrasa, compañía concesionaria do transporte urbano de Vigo, proporá aos traballadores retomar as mobilizacións co obxectivo de forzar á compañía a negociar un novo convenio colectivo, debido a que o actual está caducado desde finais de 2020.
Tal como denunciou a CIG nun comunicado, a dirección négase a actualizar as condicións laborais a pesar de que o número de viaxeiros segue crecendo, situándose xa en cifras anteriores á pandemia.
“A pesar deste incremento, a empresa segue enfocada en non negociar un novo convenio e insiste en rebaixar os salarios dos traballadores, esta vez vía xudicial ao recorrer o laudo arbitral que lle impediu reducilos no mes de xullo”, lamentou a organización sindical.
Por iso, levarán a cabo asembleas cos empregados para analizar a situación e convocar novas protestas. Decisión que o cadro de persoal adoptará a través dunha votación o vindeiro xoves, 6 de outubro.
