A Xunta de Galicia puxo en marcha este luns a mudanza dos actuais xulgados na rúa Lalín á nova Cidade da Xustiza, no antigo hospital Xeral, co inicio do traslado do arquivo xudicial.
Segundo informou o goberno galego, unha vez finalizado o traslado dese arquivo, cara a mediados do mes de outubro, continuarase co traslado do resto das 39 unidades xudiciais de Vigo, a unha media de dous órganos por semana.
Tamén está previsto situar nas novas instalacións a Fiscalía de Área, as dúas seccións da Audiencia Provincial, a subdirección do Instituto de Medicina Legal (Imelga), e o resto de servizos comúns, como o Decanato ou o Servizo de Atención ao Cidadán. O novo edificio acollerá medio milleiro de traballadores, que terán á súa disposición unha escola infantil de 41 prazas.
Coa licenza de primeira ocupación, a Xunta xa levaron a cabo os trámites previos ao traslado definitivo, como a recepción de mobiliario, a organización de espazos ou a instalación de equipos de gravación nas salas de vistas.
A nova Cidade da Xustiza de Vigo, inaugurada polo rei Felipe VI en maio pasado, contou cun investimento autonómico de 42 millóns de euros, no marco do Plan de Infraestruturas Xudiciais da Xunta de Galicia.
Nos edificios da rúa Lalín, onde actualmente están situados os xulgados da cidade, a Xunta prevé, por unha banda, a construción dun novo Centro Integral de Saúde, mentres que outro dos inmobles destinarase a usos sociais e culturais. Para iso, desenvolverase un concurso de ideas mediante convenio co Colexio Oficial de Arquitectos de Galicia (COAG) para a rehabilitación desas instalacións.
