Os Bombeiros de Vigo prestaron axuda a unha menor que cravou unha lámpada nun pé. Foi necesario cortala para que a nena puidese ser evacuada a bordo dunha ambulancia ata o centro hospitalario de referencia.

Foron os propios profesionais sanitarios os que chamaron ao 112 Galicia ás 19,30 horas deste sábado para solicitar a colaboración dun equipo de intervención que contase con ferramentas de excarceración.

Segundo a información facilitada polo 061 aos xestores do 112, a lámpada caeu encima da menor e acabou cravada no seu pé, o que non soamente dificultaba a súa mobilidade, senón tamén o seu traslado.

De inmediato, desde o Centro Integrado de Atención ás Emerxencias de Galicia púxose a situación en coñecemento dos bombeiros da cidade olívica, que se presentaron no lugar dos feitos, localizado no Camiño de Riobóo, na parroquia de Sárdoma.

Finalmente, os efectivos do Servizo de Prevención Extinción de Incendios e Salvamento confirmaron ao 112 que foi preciso cortar o material para facilitar o traslado e garantir a seguridade da menor.

O operativo foi completado polos axentes da Policía Local, que acudiron ao momento co fin de coñecer as circunstancias do suceso.