Axentes da Policía Local de Vigo detiveron este xoves a un mozo de 22 anos de idade, B.D.M., como presunto autor dun delito de atentado contra a autoridade, tras ir por un axente e tentar golpealo.

Segundo informaron fontes policiais, os feitos ocorreron de madrugada, cando unha dotación se trasladou a unha cafetaría na zona de Balaídos, alertados por testemuñas que informaban dunha forte discusión entre un grupo de persoas, que estaban a alterar a orde e impedindo o descanso dos veciños.

Ao chegar ao lugar, os axentes trataron de acougar os ánimos dos implicados na disputa e identificaron a varios deles. No entanto, un mozo negouse a achegar os seus datos e adoptou unha actitude agresiva e desafiante.

A pesar de ser advertido para que depuxese esa actitude o mozo seguiu increpando e insultando aos axentes, chegando a ameazalos. Nun momento dado, abalanzouse sobre un dos funcionarios e tentou propinarlle unha puñada.

O policía logrou esquivar o golpe, pero o mozo mantivo a súa conduta e tentou golpealo de novo, polo que foi reducido e detido por un suposto delito de atentado contra a autoridade e por desobediencia grave.