Investigadores do Centro de Investigación Mariña da Universidade de Vigo (UVigo) presentaron este mércores os avances sobre o cultivo e a conservación do ourizo de mar do proxecto Ocimer+, despois de que tras dous anos de traballo decidisen ampliar esta iniciativa oito meses máis para engadir novos enfoques.

Así, mentres que no proxecto inicial Ocimer abordáronse aspectos relacionados co cultivo e a criopreservación das especies de ourizos de mar, nesta nova etapa incluíronse dúas novas liñas de investigación: patoloxía e xenética.

Desta maneira, por primeira vez estudáronse os parásitos presentes no cinco especies de ourizos que hai na Ría de Vigo e o seu posible impacto sobre a súa conservación e cultivo. Tamén se traballou no estudo da súa caracterización xenética.

No acto deste mércores, celebrado no auditorio do edificio Cambón, participaron, entre outros, o director da Estación de Ciencias Mariñas de Toralla (Ecimat) e investigador principal do proxecto, José Manuel García, así como o director do Parque Nacional das Illas Atlánticas, José Antonio Fernández Bouzas, ademais de varios investigadores involucrados nesta iniciativa.

Segundo explicou o investigador Damián Costas, unha das liñas de traballo centrouse na evolución temporal dos índices gonadales dos ourizos, coa vista porta en tentar producir este recurso nos meses estivais. “Ata agora comercialízase no inverno”, recoñeceu, indicando que sería no verán “a época na que quizais este recurso tivese un maior valor de venda”.

Respecto do seu cultivo e repoboación, sinalou que “poida que no futuro sexa unha especie á que se pode aplicar técnicas de acuicultura, tanto para repoboación de zonas nas que se cultiva, como para manter a especie no caso de que houbese algún problema”.

O proxecto, no que traballaron dez investigadores do CIM, estudou ata 4.700 exemplares de ourizos de mar recolleitos en diferentes puntos da Ría de Vigo, segundo recolle o Diario da Universidade de Vigo (DUVI).