O portavoz municipal de Marea de Vigo, Rubén Pérez, cualificou de “imprescindibles” as axudas para a compra de libros e material escolar anunciadas polo alcalde da cidade olívica, Abel Caballero, aínda que indicou que deberían ser “proporcionais á renda”.
Nun comunicado, Marea de Vigo discrepou “” do “pago universal” que ao seu xuízo o goberno local vai realizar “á mantenta” os meses anteriores ás eleccións municipais de 2023 e que suporá que unha familia con dous fillos e ingresos por encima dos 80.000 euros ao ano recibirá 410 euros dunha administración pública, “dinamitando o concepto progresista na fiscalidade en canto a gasto público e axudas sociais”.
“Parece que o populismo propio de Ayuso chega á cidade da man de Abel Caballero, instaurando unha medida que calquera grupo municipal do PSOE desde a oposición en calquera municipio do Estado criticaría por socialmente inxusto, discriminador das familias con menos recursos e en risco de exclusión social”, lamentou Pérez.
Marea de Vigo lembrou que nos debates dos orzamentos para 2019, 2020, 2021 e 2022 xa formulou que os importes como o das bolsas de comedor e material escolar “continuaban a moverse nos mesmos importes que en 2016, 2017 e 2018”, indicando que o propio contexto económico obrigaba a reforzalas “considerablemente”.
“Agora anúnciase un pago universal de 205 euros por escolar sen baremo de renda ou patrimonio e que non ten que xustificar gasto, o que é un tiro directo na política de gasto social organizado desde hai anos nos servizos sociais do Concello”, criticou Pérez, indicando que o pago destas axudas dilatarase no tempo “para facelo coincidir coa precampaña ou coa campaña das municipais”.
