O alcalde de Vigo, Abel Caballero, anunciou este martes o inicio da tramitación dun crédito extraordinario por valor “superior aos 25 millóns de euros” para “investimento” en obras na cidade.

Segundo avanzou en rolda de prensa, con esta dotación acometerase, entre outras actuacións, a construción de beirarrúas na rúa Severino Cobas, melloras en Teixugueiras, un aparcadoiro en Matamá, e melloras na rúa Val Miñor e a contorna do estadio de Balaídos. Todo iso “para seguir facendo Vigo e seguir xerando emprego en Vigo”.

Por outra banda, o rexedor visitou as obras da segunda fase de Gran Vía, onde este martes comezou a instalación das ramplas mecánicas entre o cruzamento con Bolivia e o cruzamento con Nicaragua. Trátase de dúas ramplas duns 40 metros de lonxitude para salvar unha pendente de entre o 8,5 e o 9 %.

Esta actuación, cun investimento de 4,2 millóns de euros (que se suman aos 5,5 millóns que custaron as ramplas xa instaladas na parte baixa de Gran Vía), está cofinanciada con fondos Next Generation da UE, e a previsión é que estean finalizados os traballos na segunda quincena de xaneiro, tras un ‘parón’ durante a campaña do Nadal para non prexudicar á actividade comercial.

Con respecto á reforma da Avenida de Madrid, que se fará en virtude dun convenio asinado co Ministerio de Fomento (agora Transportes, Mobilidade e Axenda Urbana) e na que se investirán máis de 14 millóns de euros, Abel Caballero non concretou cando se poderán iniciar as obras.

Preguntado acerca da posibilidade de que o convenio poida cadudar (o prazo fixado para a finalización da vixencia do convenio é o 31 de decembro de 2022), o alcalde afirmou que ese acordo está “pechado e ben pechado, e que “hai que buscar o momento” para executar os traballos desa reforma, que será “unha gran prioridade”.