O vicepresidente primeiro da Xunta de Galicia e conselleiro de Economía, Industria e Innovación, Francisco Conde, lamentou que o Goberno rexeite a instalación dunha subestación eléctrica de moi alta tensión na fábrica viguesa do grupo automobilístico Stellantis, o que “pon en risco o futuro dos postos de traballo”.
Nun audio difundido aos medios de comunicación despois de coñecerse a noticia, Conde subliñou que esta decisión do Executivo central non só pon en risco a competitividade da planta e a súa capacidade para abaratar os custos de fabricación, senón que “sobre todo” pon en risco “o futuro dos postos de traballo”.
Para el, con esta resolución o Goberno de Pedro Sánchez demostra que a industria galega “non está na súa axenda”, a pesar das solicitudes feitas pola Xunta, pola automoción galega e pola propia Stellantis para que a factoría viguesa dispuxese de maior capacidade enerxética para operar, xa que a actual está a provocar microcortes de tensión que obrigan a facer paróns de produción.
Francisco Conde lembrou que Mariano Rajoy na súa etapa como presidente xa aprobara o desenvolvemento desta subestación eléctrica en Balaídos. Un proxecto que Pedro Sánchez “mantén nun caixón”.
Entre outros temas, o vicepresidente primeiro da Xunta tamén lembrou que aínda non se sabe como o Goberno pretende apoiar a Stellantis Vigo a través dos fondos europeos, xa que a maioría dos proxectos que a empresa quere desenvolver na cidade non podían acceder ás axudas do Proxecto Estratéxico para a Recuperación e Transformación Económica (Perte) do Vehículo Eléctrico e Conectado, debido ás esixencias do mesmo.
Neste sentido, lamentou que as empresas só solicitaron uns 600 millóns de euros dos 3.000 dispoñibles do Perte, é dicir, a penas un 20% dos fondos. Por iso, criticou que se trata dunha medida “mal deseñada” por parte do Goberno, xa que “non se tivo en conta nin ás comunidades autónomas nin aos principais fabricantes”, polo que agora chegan estes resultados.
Así, indicou que a Xunta espera que o Executivo volva activar o Perte ou transfira o diñeiro ás comunidades autónomas para que sexan elas as que xestionen de forma directa as axudas.
“VIGO TEN QUE TER REDE DE MOI ALTA TENSIÓN”
Pola súa banda, o alcalde de Vigo, Abel Caballero, cuestionado en rolda de prensa acerca da negativa do Goberno a incluír á cidade (e á planta de Stellantis) nesa rede de moi alta tensión, limitouse a sinalar: “O que teña que dicir, direillo ao Goberno de España”.
O rexedor olívico, que reafirmou nos últimos meses a súa demanda da moi alta tensión para Stellantis e erixiuse en “mediador” ante o Goberno de España para conseguilo, subliñou este mércores novamente que a súa posición “é inequívoca”. “Vigo ten que ter rede de moi alta tensión. E digo máis, vaina ter”, sentenciou.
