Abel Caballero reclama a Rueda que dea á cidade 3,5 millóns de euros dos fondos europeos

Advertiu de que se a Xunta dedica eses fondos ao Porto pero non ao Concello é porque ten un "presidente sectario" e reparte os fondos procedentes do Goberno central "con criterios de política partidista".

O alcalde de Vigo, Abel Caballero, nunha rolda de prensa na Alcaldía.. CONCELLO DE VIGO

O alcalde de Vigo, Abel Caballero, remitiu ao presidente da Xunta, Alfonso Rueda, unha carta na que reclama ao goberno galego que destine á cidade parte dos fondos europeos que o Executivo central asigna a Galicia no marco do Plan de Recuperación, Transformación e Resiliciencia, e precisou que, “de entrada”, debe asinar un convenio por “polo menos”, 3,5 millóns de euros, a mesma cantidade achegada ao Porto para o carril-bici desde o centro a Bouzas.

Nunha rolda de prensa, o rexedor olívico reiterou que, da “inxente cantidade” de fondos europeos Next Generation que o Goberno de España asigna á Xunta, a administración autonómica non dedicou “nin un euro á primeira cidade de Galicia”.

Por contra, censurou, si asigna partidas a “outras institucións”, como o Porto de Vigo, co que asinou un convenio para a construción dun carril-bici pola fachada marítima da cidade, cunha dotación de 3,5 millóns de euros. “E non dedican nada á mobilidade sustentable de Vigo”, lamentou o alcalde.

Por iso, Caballero remitiu unha carta a Alfonso Rueda na que reclama, “de entrada”, un convenio por ese mesmo importe, e advertiu de que se a Xunta dedica eses fondos ao Porto pero non ao Concello é porque ten un “presidente sectario” e reparte os fondos procedentes do Goberno central “con criterios de política partidista”.