A sección sindical da CUT en Stellantis Vigo impugnou a constitución da mesa electoral central que tutelará o proceso das próximas eleccións sindicais na factoría, que se celebrarán os días 10 (para quenda de noite) e 11 de outubro (para quendas de mañá e tarde).

A delegación territorial da Xunta na cidade acolleu este mércores o acto de laudo co árbitro designado para avaliar a impugnación do acordo alcanzado polos sindicatos SIT, CC.OO. e UGT (a CIG abstívose e CUT rexeitouno) coa empresa para a constitución desa mesa central.

O portavoz da CUT, Vítor Mariño, explicou en declaracións aos medios que o sindicato ve irregularidades na constitución desa mesa, que é o órgano que vai tutelar todo o proceso electoral e a tomar decisións como a localización das mesas, a avaliación de reclamacións, etc.

A xuízo de Mariño, producíronse “inxerencias” da empresa nun proceso que debe ser dirixido polos traballadores e os seus representantes. Así, criticou que a composición desa mesa central recolle unha elevada porcentaxe de persoal “de confianza” da empresa. “Queremos un proceso o máis democrático posible, non tutelado pola empresa”, recalcou.

“TENSIONAR” O PROCESO

Mentres, os sindicatos CC.OO. e UGT lamentaron que a impugnación da CUT non vén senón a “tensionar” o proceso e a espertar “inquietude” entre os traballadores, que poden verse coartados á hora de votar. Segundo sinalou Aser Sanz, portavoz da sección sindical de UGT, a mesa electoral central é un órgano que se constitúe do mesmo xeito nas eleccións dos últimos anos, e advertiu de que a actitude da CUT “non serve para defender os traballadores”.

“Non entendemos a súa estratexia. Se as eleccións non saen como eles queren, quererán ter unha baza para xustificarse logo”, sinalou, e lembrou que xa nas eleccións de 2018 a CUT impugnou o censo, entre outras cuestións, e o laudo arbitral “non lles deu a razón”.

Na mesma liña, Santiago García, de CC.OO., sinalou que os denunciantes “pretenden sacar un rédito sindical” coa impugnación, e que a mesa electoral central se constitúe precisamente para fiscalizar o proceso. “Non entendemos este novo intento (…), hai que dar seguridade, tranquilidade aos traballadores”, apostilou.