A CIG conmemorará o 50 aniversario da folga de setembro de 1972 en Vigo coa proxección dun documental e cunha manifestación na cidade, á vez que lamentou a falta de implicación e de “vontade política” do Concello olívico, que respondeu con “evasivas” ao ofrecemento do sindicato nacionalista para instalar nalgún lugar “digno” da cidade un monumento (sufragado pola propia central) para lembrar e visibilizar ese episodio histórico.

Nunha rolda de prensa, o secretario xeral da CIG, Paulo Carril, lembrou que este ano se están desenvolvendo diferentes actividades baixo a lema ‘Somos clase, somos nación. A loita continúa’, que comezaron cos actos celebrados en marzo en Ferrol, en homenaxe ás mobilizacións do 72 e en recordo dos traballadores Daniel Néboa e Amador Rei, asasinados pola policía franquista o 10 de marzo dese ano.

A programación esténdese agora á cidade Vigo, que en setembro de hai 50 anos foi escenario dunha folga de dúas semanas, con centos de represaliados e despedidos, e que foi un exemplo de “compromiso insobornable” da clase traballadora na loita polos seus dereitos, pola liberdade e a democracia. “Desde esa loita construíuse a historia contemporánea do movemento obreiro galego”, proclamou Paulo Carril.

No marco desta efeméride, a CIG proxectará o próximo 13 de setembro ás 19,00 horas, no auditorio de Afundación en Policarpo Sanz 24, o documental ‘Setembro de 1972, unha folga que mudou a nación galega’.

Así mesmo, o 22 de setembro, a CIG convocará unha manifestación con saída ás 11,00 horas de Vía Norte, e chamaron aos cidadáns a participar, “especialmente nun contexto como o actual, de crise económica e social, con trazos moi parecidos aos que había nese setembro de 1972”.

MONUMENTO PARA CONMEMORAR ESE EPISODIO

Por outra banda, a CIG lamentou que o Concello de Vigo respondese con “evasivas” e con “falta de vontade política” á proposta de instalar un monumento nalgún espazo digno da cidade para conmemorar o 50 aniversario desa folga.

Segundo lembrou o secretario comarcal, Alberto Gonçalves, o propio sindicato sufraxiou a construción dun monumento esculpido polo canteiro Javier Diéguez Mosquera, que consta de catro grandes bloques de pedra cos números do ano 1972 e unha estrela vermella no centro. A CIG trasladou ao Concello a súa disposición a ceder a obra á cidade, sempre que fose coidada e instalada nun espazo adecuado.

Gonçalves explicou que, a pesar dos múltiples contactos con responsables municipais e á inicial boa acollida da oferta, co transcurso dos meses a instalación do monumento quedou sen concretarse. Así, tras avaliarse varios espazos na cidade, a día de hoxe o Concello non confirmou ningún deles nin respondeu aos requirimentos da CIG, polo que o sindicato pediu unha reunión co alcalde, Abel Caballero, para “desbloquear” a iniciativa.

Con todo, o sindicato advertiu de que, se non hai resposta municipal, o día 22 de setembro finalizarán a manifestación na Praza do Rei, fronte ao Consistorio, e alí colocarán unha réplica do monumento.

Así mesmo, tanto Gonçalves como Paulo Carril instaron ao goberno local a permitir esa homenaxe, así como outras iniciativas que partiron doutros colectivos e que “tampouco foron atendidas”. De feito, o secretario xeral da CIG contrapuxo a posición do goberno vigués coa do Concello de Ferrol, onde cada ano se conmemora o 10 de marzo con actividades, “goberne quen goberne” e cun Concello que “sabe estar á altura”.