O concelleiro do BNG no Concello de Vigo, Xabier Pérez Igrexas, cualificou este mércores de “medida cosmética” a remodelación do goberno local anunciada nas últimas horas polo alcalde da cidade, e vinculou a saída Elena Espinosa da área de Seguridade coa “nefasta xestión” da concelleira socialista.

Pérez Igrexas, que lembrou que Espinosa xa deixou hai meses as responsabilidades na área de Persoal, apuntou que, baixo a súa xestión, a cidade “non foi segura por non dispor, entre outros, do número necesario de efectivos de bombeiros”, e acusou á edila de “cronificar” eses problemas.

A xuízo do concelleiro do BNG, a creación dunha concellaría para xestionar os fondos da UE, como a que Abel Caballero anunciou para Elena Espinosa, non é senón unha “coartada para camuflar” esa retirada de competencias e para que a concelleira “continúe percibindo por unha dedicación exclusiva retribuída con case 61.500 euros brutos anuais”.

“Os problemas non se resolven con cambio de caras, o que urxe é unha rectificación completa das nefastas políticas desenvolvidas tanto no ámbito de Persoal como, sobre todo, en Seguridade”, resolveu.