O presidente da Xunta, Alfonso Rueda, referiuse este martes ao enésimo desencontro co alcalde de Vigo, Abel Caballero, en relación aos problemas de abastecemento de auga se persiste a seca, e convidou ao goberno local vigués a “facer os deberes“.

Así o trasladou a preguntas dos medios durante unha visita a un albergue de peregrinos en Palas de Rei e, tras facer un chamamento a todos os municipios para que revisen as súas redes e arranxen posibles fugas, sinalou que o goberno galego, que xa “axudou” aos concellos en materia de depuración, fará agora “especial insistencia” no abastecemento.

Con respecto ao caso concreto de Vigo, apuntou que os municipios deben estar “pendentes” de que as súas instalacións poidan aproveitar un recurso “escaso” como a auga potable, e lembrou que a cidade olívica non pode facer iso no encoro de Eiras (do que se abastece) porque a súa potabilizadora non pode tratar a auga cando o volume embalsado baixa do 40 %.

“Eu non o chamaría polémica, aínda que o goberno de Vigo sempre que ten un problema trata de convertelo en polémica coa Xunta”, sinalou, en alusión ás críticas de Abel Caballero, e engadiu que “hai moito tempo que se advertiu” de que a ETAP de Vigo, nas condicións nas que estaba, “ía ter moitos problemas para funcionar e garantir o abastecemento en momentos de seca”.

Por iso, preguntouse “en que foron empregados” os “50 millóns” que os vigueses pagan ao Concello en taxas pola auga. “Desde logo, en arranxar a potabilizadora non”, constatou, e lamentou que “se empezou tarde” a obra para a ampliación e modernización desta instalación hidráulica.

Alfonso Rueda afirmou que “é unha pena” que a ETAP non poida garantir o abastecemento cun volume de auga embalsada do 40 %, como si poden facer outros municipios, e iso porque a planta de tratamento “non pode traballar de forma adecuada” con ese nivel de auga en Eiras (que pode alcanzarse en novembro) e o Concello “non o arranxou”.

“Espero que isto sirva para que se poñan as pilas. Se cren que botarlle a culpa á Xunta vai solucionar o abastecemento, diríalles que non. O que soluciona é que fagan os deberes, e que os tivesen feitos en tempo e forma”, sentenciou o presidente do goberno galego.