Un condutor foi interceptado na madrugada do venres despois dunha persecución por Redondela na que chegou a alcanzar os 140 quilómetros por hora tras saltarse un control policial.
O home tratou de eludir un control instalado na N-550 á altura da Rúa do Muro e a persecución prolongouse durante case 3 quilómetros por camiños da parroquia de Cedeira, segundo informou a Policía Local.
Unha vez interceptado, o condutor, que carecía de permiso de conducir e manexaba un coche sen ITV vixente, deu positivo na proba de alcoholemia e na de drogas. Ademais, o individuo levaba no seu vehículo sustancias estupefacientes e viaxaba acompañado dun can de “raza potencialmente perigosa” que carecía da documentación necesaria.
