O alcalde de Vigo, Abel Caballero, inaugurou este venres a nova oficina municipal de Turismo da cidade, que se atopa en López de Neira, e que substitúe ás instalacións que anteriormente se situaban nas proximidades da Estación Marítima.

A nova oficina, “en pleno corazón” da cidade, está nun local de 154 metros cadrados e “ben preparado para atender á xente”, segundo trasladou o rexedor, que apuntou que a anterior oficina “estaba pensada hai 15 anos para un Vigo practicamente sen turismo, enfocada ao turismo de cruceiros, que é un turismo de baixisima calidade e non ten interese para a cidade”. Ademais, incidiu, o novo local permitirá ao Concello un aforro duns 60.000 euros ao ano en aluguer.

Segundo subliñou Abel Caballero, “Vigo é unha potencia turística en España” e consegue atraer visitantes ao longo de todo o ano. Así, asegurou que o nivel de ocupación de xuño, xullo e agosto rolda o 90 % (aínda que o INE publicou esta semana que a ocupación media por praza de aloxamento na cidade foi do 68,3 % no mes de xullo).

Ademais, celebrou que a cidade conseguiu esas cifras sen axuda do goberno galego. “Non dependemos da publicidade da Xunta, que publicita sen parar Santiago e o Xacobeo. A nosa publicidade son as miñas aparicións nos medios de España”, afirmou.