O grupo Fito & Fitipaldis actuará en Vigo o próximo 28 de outubro no marco da programación musical do Xacobeo 21-22, segundo anunciou este xoves a delegada territorial da Xunta na cidade, Marta Fernández-Tapias.
Así, Fito & Fitipaldis chegará ao Auditorio Mar de Vigo en outubro coa súa nova xira ‘Teatros e Auditorios’, tras completar este mes de xullo o tour do seu último disco. As entradas sairán á venda o vindeiro luns, 1 de agosto, a través de ‘Teuticket’.
“Esta nova actuación vén completar a mellor oferta musical que terá a cidade este ano”, reivindicou Fernández-Tapias, destacando outros concertos como o do grupo británico Muse ou o de C. Tangana, co patrocinio do Xacobeo.
Ademais, Fito & Fitipaldis tamén actuará na Coruña. Será ao día seguinte, o 29 de outubro, no Palacio da Ópera da cidade. O delegado da Xunta na urbe herculina, Gonzalo Trenor, subliñou que o obxectivo do Executivo galego con estes concertos é promover a celebración do Ano Santo, apostando pola celebración de eventos musicais que sitúan a Galicia no imaxinario colectivo.
