O Porto de Vigo destinará máis de 180.000 euros (máis IVE) a varias intervencións no porto pesqueiro relacionadas coa mellora das condicións de traballo e a calidade e o control da rastrexabilidade dos produtos da pesca.
Así o sinalou o presidente da Autoridade Portuaria, Jesús Vázquez Almuiña, aos usuarios do Berbés, explicando que a Consellería do Mar da Xunta de Galicia concedeu unha axuda cofinanciada polo Fondo Marítimo e de Pesca (FEMP) da Unión Europea a dous proxectos promovidos polo Porto olívico.
A primeira das actuacións, segundo recolle o Porto nun comunicado, pretende executar unha liña de 36 metros de pantaláns de francobordo adecuados á frota e de 4 metros de ancho, mellorando os espazos actuais para a descarga. O proxecto conta cun orzamento de 105.000 euros, do que o 75% estará subvencionado pola FEMP e o 25% restante polo Goberno galego. As obras deben de estar acabadas en decembro.
A segunda iniciativa dotará ás instalacións de poxa de medios técnicos que permitan realizar a rastrexabilidade e o rexistro en tempo real, tanto das descargas dos barcos artesanais, como da poxa das especies estacionais e marisqueo. Estas melloras están orzadas en 77.180 euros, financiado pola FEMP (75%) e a Xunta (25%), e tamén deberán estar finalizadas antes de que termine o ano.
Noutra orde de cousas, o Porto de Vigo anunciou que os seus traballadores lograron catro medallas de ouro nas Olimpíadas de Policías e Bombeiros de Róterdan (Países Baixos), nas que participaron dous policías portuarios: Tania Valverde e Carlos Adán na modalidade de atletismo.
