O BNG de Vigo criticou este mércores a negativa do alcalde de Vigo, Abel Caballero, a explicar as xestións realizadas polo rexedor co Goberno central para investigar as causas do naufraxio do pesqueiro galego ‘Villa de Pitanxo’.

Todo iso despois dunha pregunta rexistrada polo Bloque no pleno do Concello de Vigo deste mércores, que fora comprometida coas familias das vítimas, e que a resposta recibida por parte dos socialistas, xa que o alcalde non se atopaba no pleno nese momento porque se ausentou antes, foi que é unha cuestión tan “transcendental” que debería tratarse a través dunha moción.

O concelleiro nacionalista, Xabier P. Igrexas, lembrou que unha pregunta rexistrada por escrito obriga a unha contestación oral na mesma sesión. Con todo, o tenente de alcalde, Javier Pardo (que nese momento presidía o pleno porque Caballero xa se había ido), limitouse a alegar que o asunto debería ser abordado como unha moción, sen ofrecer máis explicacións.

“Sen coñecer completamente a verdade do que ocorreu non pode haber xustiza, e sen xustiza non pode haber a reparación que merecen as familias das vítimas”, lamentou Pérez Igrexas.

Entre outras iniciativas da oposición que foron rexeitas polos socialistas, que contan con maioría absoluta en Vigo, atopábase unha moción do PP que buscaba instar o Goberno de España a dotar dos trens Avril para permitir a chegada da alta velocidade á cidade olívica.

Tamén o grupo municipal Mixto, formado por Marea de Vigo, impulsou unha moción para que o goberno local garantise o cumprimento da lexislación laboral nas concesionarias municipais. Unha iniciativa que foi rexeitada cos votos do PSOE, a pesar de que tanto BNG, como PP e Marea de Vigo votaron a favor.