Decenas de persoas inauguraron este luns en Vigo a XX Conferencia Bianual do Instituto Internacional de Economía e Comercio Pesqueiros (IIFET, polas súas siglas en inglés), a cal levará a cabo no Auditorio Mar de Vigo ata o vindeiro venres e contará con máis de 200 participantes diarios procedentes de 50 países de todo o mundo.

Neste simposio abordaranse temas específicos como os mercados e o consumo, a gobernación e os sistemas de xestión, a diversidade produtiva ou cuestións de xénero relacionadas co medio mariño. O foro busca promover un intercambio de ideas na investigación, a información e a economía da pesca e a acuicultura.

Na súa intervención durante a inauguración, a conselleira do Mar, Rosa Quintana, puxo de manifesto o peso da cadea mar-industria na economía galega, cun volume de ingresos de case 9.000 millóns de euros ao ano.

A titular de Mar explicou que 76 das 83 ramas de actividade da economía galega teñen relación co sector marítimo-pesqueiro, segundo reflicten as últimas táboas input-output que se publicarán proximamente e que mostran as relacións e os impactos directos e indirectos dos sectores marisqueiro, pesqueiro e de cultivos mariños.

En base a estes datos, tal como dixo Quintana, o Goberno galego asenta a toma de decisións estratéxicas para o sector de maneira conxunta e da man da cogobernanza, co obxectivo de defender os intereses do sector con “argumentos técnicos, estudos científicos e informes sólidos”.