A Policía Nacional da Comisaría de Vigo alertou este mércores dunha onda de estafas que afectou polo menos a 9 empresas da cidade, ás que un falso provedor esixiu o pago de diversas cantidades de diñeiro para poder entregar certa mercadoría.

Segundo informaron fontes policiais, a alerta activouse cando se denunciou unha estafa por parte dunha concesionaria de aparcadoiro da cidade. Un dos empregados de aparcadoiro recibiu unha chamada de alguén que se fixo pasar por directivo da empresa e que lle explicou que estaba pendente de recibir un pedido dun sistema de vídeo-vixilancia, pero que non lograba contactar coa encargada do aparcadoiro e que tería que encargarse el de recibir o material.

A continuación, e para dar credibilidade ao engano, coa escusa de que non escoitaba ben ao empregado, pediulle o seu número de teléfono particular para chamalo e deixar así libre a liña de teléfono do aparcadoiro. Mentres seguía falando co empregado, ao que chamara ao seu número privado, os cómplices da estafa chamaron ao teléfono do aparcadoiro para facerse pasar por provedores e advertir de que tiñan pendente de entrega a mercadoría, á espera de recibir un pago.

Todo isto ocorría mentres o empregado seguía en comunicación co falso directivo, que lle deu indicacións para que collese diñeiro da caixa e o ingresara ao provedor desde un locutorio, xa que seguía sen localizar á encargada.

Despois de facer o ingreso, o empregado regresou ao aparcadoiro e recibiu unha chamada da encargada, que levaba tempo tentando contactar con el sen conseguilo (xa que tiña a liña de móbil ocupada). O home explicoulle o sucedido e a encargada aclaroulle que non estaban pendentes de recibir ningún sistema de vídeo-vixilancia, descubríndose que todo fora unha estafa.

A Policía explicou que, ademais desta empresa, outras oito compañías máis da cidade (dúas panadarías, unha cadea de supermercados, un estanco, unha clínica e outro tres aparcadoiros) foron enganadas con este mesmo modus operandi: unha chamada dun directivo ou dun suposto provedor que esixía diñeiro a cambio de entregar unha mercadoría.

En todos os casos, os estafadores contactaban cos empregados desde un número de teléfono con prefixo +54, correspondente a México, e sempre puñan a escusa de que non escoitaban ben para pedir aos seus interlocutores que lles facilitasen os seus números de contacto persoais. Durante a comunicación coa vítima, sempre soaba o teléfono fixo da empresa, por chamadas de supostos transportistas e provedores que pedían diñeiro (entre 800 e 1.800 euros, segundo o tamaño da empresa) para facer as entregas, coa advertencia de que, se non pagaban, perderían a mercadoría ou terían que abonar unha penalización.

A Policía Nacional fixo un chamamento ás empresas a extremar a prudencia e a non facilitar datos nin números de teléfono sen confirmar quen é o interlocutor. Tamén advertiu de que non se deben facer pagos a través de empresas de servizos financeiros situados en kioskos ou locutorios, senón polas canles habituais.