A presidenta da Deputación de Pontevedra, Carmela Silva e o reitor da Universidade de Vigo, Manuel Reigosa, mantiveron este martes unha reunión de traballo para perfilar o novo protocolo de colaboración que proximamente asinarán ambas as institucións e que estará envorcado na captación de máis fondos europeos, en continuar avanzando cara a “igualdade real” na sociedade e en reforzar a colaboración público-privada.

A partir de agora “grupos de traballo específicos” encargaranse do seguimento destes tres eixos centrais.

“Temos claro que queremos impulsar o coñecemento e a innovación, a transformación baseada no medio ambiente, a mobilidade amable e segura, a sustentabilidade turística ao redor de hábitos saudables e dos espazos naturais, a atracción de eventos culturais e deportivos e, desde logo, a igualdade”, sinalou Carmela Silva.

A presidenta provincial sinalou a necesidade de aproveitar os fondos da Unión Europea para pechar a “fenda dixital”, para materializar equipamentos e infraestruturas que contribúan á “loita contra o despoboamento” ou para “singularizar” o sector primario da provincia.

Segundo informou a administración provincial, neste encontro tamén participaron as vicerreitoras de Investigación, Transferencia e Innovación, Belén Rubio; Estudiantado e Empregabilidade, Natalia Caparrini, e a nova vicerreitora do campus de Pontevedra, Eva María Lantarón, ademais do deputado provincial Carlos López Font.

Reigosa apuntou que a deste martes é unha visita “obrigada”, despois da súa reelección como reitor e que con ela tamén pretendeu pór de relevo a implicación da Deputación coa Universidade de Vigo.

PROTOCOLO PIONEIRO

Tras a reunión, Carmela Silva fixo balance do “pioneiro protocolo de colaboración” que as dúas institucións asinaron en 2015 e que contemplaba o impulso dos proxectos de especialización Campus Crea, en Pontevedra, e Vigo Tecnolóxico a través de plans estratéxicos e proxectos singulares.

Ademais, aquel acordo apostaba por explorar vías para “captar recursos internacionais”, especialmente da Unión Europea, “que permitan desenvolver proxectos de interese para a provincia”. E tamén tivo como unha das súas accións destacadas a posta en marcha da Cátedra Feminismos 4.0.