A Facultade de Económicas da UVigo acolleu este martes a presentación institucional do centro de investigación interuniversitaria Ecobas, que naceu como agrupación estratéxica hai uns anos, e cuxo eixo de traballo céntrase na sustentabilidade, tanto económica, como ambiental e social.
Economics and Business Administration for Society (ECOBAS) deu o ‘salto’ para transformarse en centro de investigación a finais de 2021, coa firma dun convenio entre a UVigo, a Universidade da Coruña e a Universidade de Santiago de Compostela; e a principios de 2022 un comité avaliador valorou todas as solicitudes recibidas de persoal investigador, acordando a incorporación de 84 profesionais das universidades galegas.
Este martes, no campus de Vigo, tivo lugar a súa presentación ‘en sociedade’, nun acto que contou coa presenza do reitor vigués, Manuel Reigosa; o reitor da UDC, Julio Abalde; o vicerreitor de Transformación Dixital e Innovación da USC, Gumersindo Feijóo. Tamén asistiron o director do centro, o catedrátido de Matemáticas da UVigo, Carlos Hervés, e a súa directora científica, María Loureiro.
Os responsables de Ecobas lembraron os logros dos centros así como os seus retos futuros. Así, entre 2017 e 2021, Ecobas captou máis de 12,5 millóns de euros e realizou 216 publicacións.
Carlos Hervés avanzou que, pese ao balance positivo, quedan dúas cuestións que resolver no curto ou medio prazo: a obtención do recoñecemento e a acreditación do centro por parte da Xunta de Galicia, que solicitarán este mes de xullo; e por outra banda, a solicitude dunha axuda de financiamento na convocatoria que publique a administración autonómica.
María Loureiro explicou que o eixo central de traballo do centro é a sustentabilidade “entendida nun sentido amplo, é dicir, non só desde o punto de vista económico senón tamén desde o ambiental e o social”. Eses son o tres alicerces sobre os que se desenvolve a Axenda Científica de Ecobas, que conta con 12 prioridades específicas como as finanzas sustentables, a economía pública e rexional, a economía da saúde, a equidade, inclusión social e benestar, a transición enerxética e descarbonización ou a economía circular.
Pola súa banda, o Plan Estratéxico do centro está deseñado para alcanzar cinco obxectivos principais: exercer un liderado científico no estudo da sustentabilidade, captar e potenciar o talento investigador, fomentar e potenciar unha formación de calidade e a súa internacionalización, promover unha maior visibilidade e recoñecemento internacional, e conseguir un maior impacto e proxección económica e social. “Con estes obxectivos en mente deseñouse un plan organizado ao redor de oito eixos de acción: Ecobas Research, Ecobas Training, Ecobas Talent, Ecobas Society, Ecobas International, Ecobas Open Science & RRI, Ecobas Communication e Ecobas Management”, explicou Carlos Hervés.
