O grupo municipal Marea de Vigo esixiu ao goberno local que tome medidas para que o desenvolvemento urbanístico do ámbito da antiga conserveira Alfageme leve a cabo de maneira que os traballadores poidan cobrar a súa débeda, e que “non pase o que ocorreu cos terreos do Grupo de Empresas Álvarez” en Cabral.
O portavoz do grupo, Rubén Pérez Correa, sinalou que moitos terreos industriais da cidade acabaron con fábricas abandonadas e cos espazos recalificados para outros usos non industriais. “Algo que parece que vai ocorrer nos terreos da antiga Alfageme”, apuntou.
Respecto diso, lembrou que existe un acordo plenario no que a Corporación pactou que calquera operación urbanística neses terreos debería facerse vinculada á reparación e compensación ao antigo persoal da conserveira, que se foi á rúa ao pechar a factoría en 2010.
“Pero a realidade é que non está a ser así (…), o goberno local pretende incorporar os terreos á novo PXOM se contar cos acordos plenarios previos”, denunciou Pérez Correa, quen pediu que se evite o “agravio” aos traballadores e que a operación se converta nunha acción “especulativa” para “alimentar” outras operacións na zona.
Finalmente, o portavoz de Marea pediu que non ocorra o mesmo que pasou cos terreos do Grupo de Empresas Álvarez, en situación de abandono e cuxos antigos traballadores seguen sen cobrar.
