O operativo despregado pola Garda Civil contra unha armazón dedicada á fabricación de ‘narcolanchas’, e coordinado desde un xulgado de Vigo, saldouse finalmente con 60 detidos (un deles en Portugal) e 47 embarcacións intervidas.
A investigación da bautizada como Operación Endurance levouna adiante o Equipo de Delincuencia Organizada e Antidroga (EDOA) da Garda Civil, con colaboración do Órgano de Coordinacón contra o Narcotráfico de Andalucía e a Policía Judiciaria portuguesa, e iniciouse en febreiro do ano pasado.
Naquel momento, a Garda Civil tivo coñecemento de que, nunha nave do polígono de Cotogrande, en Vigo, estaban a construírse lanchas tipo EAV (embarcacións de alta velocidade), que posteriormente se empregarían para a introdución de grandes cantidades de haxix en augas do estreito de Gibraltar.
Así, as pescudas posteriores permitiron desubrir que existía unha armazón “perfectamente estruturada”, que abarcaba todo o proceso de fabricación, desde a fase inicial ata a finalización das embarcacións, asentado no sur de Galicia e o norte de Portugal.
Tamén se constatou a existencia de empresas de transporte que trasladaban as lanchas a naves seguras noutras provincias como Toledo ou Sevilla, onde a organización acababa de arranxalas antes da súa botadura ao mar en distintas localizacións, especialmente do litoral de Andalucía.
Segundo a Garda Civil, a organización contaba con membros cunha “alta especialización”, tanto para a fabricación e custodia, como para a finalización das embarcacións.
De feito, froito das investigacións, púidose aprehender, a principios de xuño, un cargamento dunha tonelada de haxix transportado por unha destas ‘narcolanchas’ na praia del Vigía, en Mazagón, Huelva.
DETENCIÓNS E REXISTROS
No marco do dispositivo policial levaron a cabo 59 detencións nas provincias de Pontevedra, Ourense, Barcelona, Tarragona, Toledo, Cádiz, Huelva, Málaga, Sevilla e Almería. Ademais, solicitouse unha Orde Europea de Detención en Portugal, por parte do xulgado que entende da causa, e a Policía Judiciaria arrestou así a un dos principais investigados, fincado en territorio luso.
Por outra banda, levaron a cabo numerosos rexistros en domicilios da provincia de Pontevedra; en naves situadas en localidades do norte de Portugal, como Ponche de Lima, Valença, Paredes de Coura ou Monçao; e nas provincias de Toledo, Sevilla, Huelva, Xirona e Barcelona.
Nestes rexistros interviñéronse un total de 47 embarcacións, cascos e moldes de EAV de grandes dimensións, motores de alta velocidade de 300, 350 e 400 cv, cabezas tractoras e remolques utilizados para o transporte das lanchas, documentación e material informático.
Das embarcacións incautadas, máis dunha decena atopábanse terminadas e estaban preparadas para a navegación, “e en disposición de ser empregadas na introdución de grandes cantidades de sustancias estupefacientes”.
COMPARECENCIAS XUDICIAIS
Do total de detidos na Operación Endurance, 8 dos arrestados en Galicia (unha novena persoa quedou libre en sede xudicial) pasaron a disposición do xulgado de instrución de Vigo este mércores, cinco homes e tres mulleres. Segundo confirmaron fontes xudiciais, cinco ingresaron en prisión. Todos eles, detidos fóra de Galicia, están investigados por delitos contra a saúde pública, contrabando e organización criminal.
Estes ingresos a prisión súmanse aos tres decretados este mércores tras levar a cabo interrogatorios a oito detidos, que duraron ata xa entrada a noite. Non está previsto que pasen máis detidos a disposición xudicial.
