A Garda Civil incautou o pasado día 8 de xuño unha partida de roupa, calzado e bolsos supostamente falsificados nun control selectivo de vehículos en Vigo.

Tal como informou a Benemérita nun comunicado, os feitos ocorreron no transcurso dun control de automóbiles que estaba a realizar a patrulla Fiscal e Fronteiras da Garda Civil de Tui na estrada do Aeroporto de Peinador na cidade olívica.

Nun dos vehículos inspeccionados, un camión dunha empresa de paquetería, os axentes comprobaron que transportaba 79 caixas con pezas de roupa de recoñecidas firmas comerciais coas etiquetas supostamente falsificadas.

En total contabilizáronse máis de 25.250 pezas, na súa maior parte de roupa deportiva. Ao comprobar os compoñentes da patrulla que o condutor do camión carecía da correspondente factura de compra, así como da preceptiva autorización das marcas rexistradas afectadas, procedeuse á súa incautación, cuxo valor auténtico no mercado pode superar o millón de euros.

A mercadoría incautada púxose a disposición do Xulgado de Instrución de garda de Vigo e o propietario foi investigado penalmente por un delito contra a propiedade industrial.