O salón de actos da Facultade de Económicas do Campus de Vigo acollerá este luns a toma de posesión do reitor da Universidade olívica, Manuel Reigosa, e do seu equipo de goberno, nun acto que estará presidido polo titular do Executivo galego, Alfonso Rueda.

Reigosa foi reelixido reitor da UVigo o pasado 4 de maio, cun 72,3 % do voto ponderado favorable, nun proceso que estivo marcado polo falecemento repentino, o día antes das eleccións, do vicerreitor Manuel Ramos, que formaba parte da candidatura de Reigosa.

No acto deste luns intervirá, en primeiro lugar, o secretario xeral da institución que, como é habitual nestes casos, dará lectura ao decreto de nomeamento do reitor. A continuación, Reigosa prometerá o seu cargo e o presidente da Xunta faralle entrega da medalla de reitor e do bastón de mando.

O novo reitor pronunciará o seu discurso e dará paso despois á toma de posesión dos novos cargos do equipo reitoral, integrado por 12 membros. Finalmente, a intervención de Alfonso Rueda porá punto final ao acto.