A falta de aprovisionamentos levará á planta de Stellantis en Vigo a realizar novas paradas de produción a próxima semana, segundo confirmaron fontes da empresa ao persoal.
Así, a dirección comunicou aos traballadores que “por causa de forza maior” e a consecuencia desa falta de subministracións, cancelarase a actividade no sistema 1 de produción –que monta os modelos Peugeot 2008, Peugeot 301 e C-Elysée– na quenda de tarde do xoves 23 de xuño e na quenda de noite do domingo 26.
Con respecto ao sistema 2 de produción, onde se montan as furgonetas, o programa de xuño mantense, de momento, sen alteracións.
A principios de xuño, a factoría viguesa comunicara que melloraban as súas previsións de aprovisionamentos e reducía os días de parada en xuño e xullo. Así, confirmaba como laborables os días 30 de xuño e 1 de xullo, así como o 19 de xuño para o sistema 2.