A Xunta de Galicia reclamou este venres ao Concello de Vigo acelerar nas obras dos accesos ao complexo intermodal de Urzáiz para poder pór en funcionamento a nova estación de buses, cuxa construción terminou, e o goberno local vigués puntualizou que o túnel de Lepanto que está a executar non é necesario para dar servizo á terminal, xa que os autocares non o utilizarán para entrar ou saír das dársenas.

A delegada territorial do goberno galego, Marta Fernández-Tapias, visitou este venres a estación, con motivo da recepción das obras, e lembrou que a Xunta investiu 18 millóns de euros na terminal, que albergará 2 millóns de usuarios ao ano e 500 expedicións de buses.

Con todo, lamentou que debido ao atraso nas actuacións do Concello, a estación intermodal “non poderá entrar en funcionamento”. “Seguen falando de terras contaminadas, e xa non sei se agora darán outra escusa, pero como poden ver, a zona de construción é a mesma para as dúas administracións e nós tivemos as mesmas terras contaminadas que eles”, ironizou, en alusión aos traballos de execución do túnel de Lepanto, que leva a cabo o Concello.

As críticas da delegada territorial tiveron rápida resposta do goberno local vigués e a concelleira de Urbanismo, María José Caride, concluíu que Marta Fernández-Tapias “descoñece o proxecto”, porque as entradas e saídas de autocares á estación “en ningún caso serán polo túnel do Lepanto”.

Nese sentido, acusou a Xunta de pretender “enredar” e engadiu que “o importante” é que comunique “canto antes” ao Concello de Vigo os cambios que pretende facer en itinerarios e frecuencias de rutas para que a administración municipal os autorice. “A Xunta di que necesita un mes para informar a operadores e usuarios, pois xa está a tardar, porque o Concello aínda non lle chegou a información”, sentenciou.