Un clan integrado por varios membros dunha mesma familia e outros colaboradores aceptou este martes penas que suman 9 anos de prisión por dous delitos de tráfico de drogas, segundo o acordo de conformidade e a sentenza ditada pola sección quinta da Audiencia Provincial de Pontevedra.

O tribunal aplicou ao sete acusados a circunstancia atenuante de dilacións indebidas e , no caso da matriarca do grupo, a agravante de reincidencia. Esta muller, Rosa María J.M., foi inicialmente investigada por vender heroína e cocaína no seu domicilio do barrio vigués da Dobrada, con axuda doutro dos acusados.

Por mor dunha primeira detención, a muller cambiou o seu ‘modus operandi’ e recorreu ao seu fillo, que empezou a vender a droga desprazándose de madrugada na súa moto. Máis tarde, debido ás súas débedas e a que os provedores deixaron de fiarlle, a matriarca cambiouse á venda de haxix.

Así, introducía o haxix na prisión da Lama, onde estaba a cumprir condena o seu sobriño, por medio da muller deste, nos ‘cara a cara’. Os acusados aceptaron penas que oscilan entre os 9 meses e os dous anos de cárcere, e multas entre 160 e 6.130 euros.

PROBLEMAS CON PROVEDORES E CAMBIO DE DROGA

Con ocasión desa primeira detención, interveuse xudicialmente o teléfono da matriarca e os investigadores comprobaron que a muller tiña problemas de débedas e que os provedores deixaran de fiarlle. Por iso, a xefa do clan cambiou á venda de haxix.

Así, introducía o haxix na prisión da Lama, onde estaba a cumprir condena o seu sobriño, que recibía as landras de haxix durante visitas e logo vendíaas a outros reclusos. Do mesmo xeito, con axuda de familiares, vendeu droga a unha muller que, á súa vez, entregouna ao seu marido interno na Lama, aproveitando os ‘cara a cara’.

Os acusados recoñeceron os feitos e Rosa María J.M., Martín C.G. e Enrique P.J (fillo da primeira) aceptaron a pena de 2 anos de cárcere e multa de 6.130 euros por un delito de tráfico de estupefacientes na modalidade de drogas que causan grave dano á saúde.

O resto de acusados, Lorena B.R., Enrique P.R, Felipe D.J., e Félix J.G., aceptaron 9 meses de prisión e multas de 160 euros, excepto a muller, á que se lle impuxo unha multa de 200 euros.