InicioSociedadeSuspenden unha licitación en Vigo que subroga un condenado no 'caso enchufe'

Suspenden unha licitación en Vigo que subroga un condenado no ‘caso enchufe’

O goberno local matiza que a paralización cautelar é "o procedemento habitual" cando se presenta un recurso.

PUBLICADO O

O Tribunal Administrativo de Contratación Pública de Galicia (TACGAL) acordou suspender preventivamente a licitación do contrato de mantemento de iluminación pública en Vigo, tal e como solicitaba o grupo municipal do PP, en tanto non se aclare se se produciron irregularidades no proceso, por incluírse na lista de persoal a subrogar ao xerente dunha empresa, condenado (xunto a un exfuncionario do Concello olívico) por ‘enchufar’ na súa empresa, concesionaria de servizos municipais, á cuñada de Carmela Silva.

Hai uns días, o PP anunciou a impugnación deste proceso de licitación, ao considerar que se está cometendo unha “fraude”, porque na listaxe do persoal a subrogar pola empresa adxudicataria do concurso figura Ramón C.A., xerente de Imesapi, e condenado polos tribunais por falsidade documental, en concurso cun delito de malversación (considerouse probado que a cuñada de Silva cobrou algo máis de 108.000 euros por uns traballos que nunca realizou, nin ela, nin a concesionaria que a contratou).

Na súa denuncia, os ‘populares’ solicitaron que se suspendese a licitación, e agora o TACGAL accedeu a esa suspensión cautelar, aínda que dita decisión non afecta o prazo concedido para a presentación de ofertas ou propostas por parte dos interesados. Así mesmo, o tribunal de contratación tampouco se pronuncia sobre o fondo do recurso interposto polo PP.

IMPUGNACIÓN DO PP

O grupo municipal do PP presentou un recurso especial ante o TACGAL por considerar que se vulnera a lei de contratos públicos no que respecta á prevención da corrupción e dos conflitos de intereses. O portavoz dos populares, Alfonso Marnotes, denunciou que o goberno municipal impuxo o nome de Ramón C.A. na listaxe de persoal a subrogar nese concurso público, un xerente dunha empresa que foi condenado no ‘caso enchufe’ e cuxo salario rolda os 90.000 euros.

Por outra banda, tamén denunciou que o goberno local apurou os prazos para licitar o concurso do mantemento de iluminación, ata que a Audiencia acordou suspender a execución da pena de prisión para esta persoa, todo iso para “blindar” a contratación de Ramón C.A., “pagarlle o favor” e “asegurar o seu silencio” (nin este condenado, nin o exfuncionario Francisco Javier G.O. desvelaron nunca quen lles deu indicacións para contratar á cuñada de Silva).

Tras coñecerse a suspensión cautelar, Marnotes celebrou que o TACGAL “dá a razón” ao grupo municipal do PP, ao acceder á suspensión cautelar. “Sempre dixemos que se tiña que cumprir a lei de contratos (…) e trátase dun auténtico escándalo obrigar a unha concesionaria a asumir a nómina de quen contratou ilegalmente á familiar de Carmela Silva”, proclamou.

RESPOSTA DO CONCELLO

Tras coñecerse a decisión do Tribunal, o goberno municipal de Vigo matizou que “é completamente falso” que o TACGAL dea a razón ao PP, senón que a paralización preventiva da licitación é “o procedemento habitual nestes casos”. “Sempre que se presenta un recurso sobre unha licitación, esta tramitación queda suspendida de forma automática”, sinalaron fontes municipais nun comunicado.

Finalmente, e tras incidir en que o Tribunal non paraliza os prazos, o goberno vigués censurou que o PP de Vigo “se sitúa na mentira de forma reiterada, e como sigan mentindo deste xeito, van conseguir cero concelleiros nas próximas eleccións municipais”.

ÚLTIMAS

Asistidas un pai e a súa filla en Vigo tras producirse un incendio na súa vivenda

Dúas persoas, un pai e unha filla, necesitaron asistencia en Vigo este xoves tras producirse...

Emilio Sotelino ou a Asociación de Viúvas Demócratas entre os Vigueses Distinguidos 2024

O pleno de Vigo aprobou este luns por unanimidade nunha sesión extraordinaria os novos Vigueses...

O goberno de Vigo aproba o marco orzamentario ata 2027 e prevé investimentos por valor de 33 millóns cada ano

O alcalde de Vigo, Abel Caballero, anunciou que o goberno local aprobou o marco...

Pechados parques e espazos arbóreos da cidade de Vigo debido ao temporal

O Concello de Vigo restrinxiu por seguridade o acceso aos parques e espazos arbóreos...