O vicepresidente económico da Xunta, Francisco Conde, volveu reclamar este venres ao Goberno central que atenda as necesidades da automoción galega no PERTE para este sector e, concretamente, que as axudas europeas poidan dar “resposta” á planta de Stellantis en Vigo.

Así o trasladou durante a súa intervención na clausura do II Foro Industrial de Fondos Europeos de Recuperación, organizado na cidade por Asime, e na que advertiu de que “a automoción galega non pode quedar fóra” das axudas despois de demostrar ” a súa capacidade de competir”.

Respecto diso, advertiu de que o PERTE debe dar resposta a un sector estratéxico en Galicia e recoñecer o seu “esforzo” e, concretamente á planta de Stellantis, para que poida “competir en igualdade de condicións”.

Conde fixo referencia a proxectos que optan a eses fondos, como o AutoÁncora ou o circuíto de probas de CTAG e Zona Franca, e tamén pediu ao Executivo central que “reconsidere” a súa decisión de deixar fóra da rede de moi alta tensión á fábrica automobilística viguesa.

O vicepresidente e conselleiro de Economía, Empresa e Innovación, que lembrou novamente que aínda non se coñecen as condicións das axudas do PERTE do naval, sinalou que os fondos europeos son unha “oportunidade” pero é fundamental facer unha correcta xestión dos mesmos. “Non nos podemos permitir fracasar na execución deses fondos”, subliñou.

“POR BO CAMIÑO”

Mentres, durante a súa intervención, o alcalde de Vigo, Abel Caballero, tamén se referiu ao PERTE da automoción e subliñou que “hai que casar os calendarios” que manexa Stellantis nos seus proxectos e os da UE. “Hai quen asigna culpas antes de saber”, puntualizou.

A continuación, o rexedor asegurou que está “a mediar” para que Stellantis poida beneficiarse das axudas, malia non ter competencias. “No canto de falar, hai que porse a iso”, proclamou, e engadiu: “Vai polo bo camiño, estamos na fase de resolvelo”.

Abel Caballero asegurou que hai “diálogo” entre Stellantis, Concello e o Goberno de España, e que o Executivo central “ten a vontade absoluta de que Stellantis estea nos proxectos con financiamento”.

Con respecto ao PERTE do naval, prognosticou que “irá ben”, aínda que puntualizou que botou de menos que “algunhas comunidades autónomas non tomasen a dianteira presentando os seus plans”, e agora “hai que recuperar o tempo perdido porque algúns foron lentos”.