O teatro Afundación de Vigo acollerá o próximo 5 de xuño o Festival Solidario Sorrisos para Ucraína a favor do Fondo das Nacións Unidades para a Infancia (Unicef) co obxectivo de que poida continuar dando respostas ás urxentes necesidades dos nenos e as súas familias no ámbito da saúde, a nutrición, a protección e a educación.
Tal como indicou Afundación nun comunicado, a guerra de Ucraína provocou a maior crise de refuxiados en Europa desde a Segunda Guerra Mundial, xa que máis de 12 millóns de persoas abandonaron os seus fogares.
Promovido por Afundación, e coa colaboración de Pallaso Popín e a Fundación Mayeusis, o Festival Solidario Sorrisos para Ucraína terá dúas funcións, ás 12,00 horas e ás 19,30 horas, unha dirixida ao público infantil e familiar e a outra ao público adulto, respectivamente.
“Impactado pola crueza da guerra na infancia, púxenme ao choio para mobilizar a todo o elenco que é parte deste festival solidario a favor de Unicef. Artistas, músicos, bailaríns, cómicos, magos e pallasos unímonos de forma totalmente desinteresada para ofrecer, o vindeiro domingo 5 de xuño, os nosos mellores espectáculos cheos de humor, maxia e cor”, apuntou Adolfo Maguna, Pallaso Popín.
