Nova denuncia da Asociación Veciñal de Teis. Desta vez, a plataforma do barrio vigués vén de cargar contra a “paralización” das obras da II fase da humanización na rúa Purificación Saavedra, que, segundo explican, levan xa meses conxeladas sen explicación mediante.

A intervención focalízase no tramo entre a rúa Foxos e a rúa Enrique Lorenzo, unha parcela que debería estar xa rematada, de acordo coas mesmas fontes. “As obras comezaron hai meses en outubro de 2021 e está sen finalizar como se pode comprobar, coas molestias que isto supón para a veciñanza desta rúa e do resto de Teis. Temos que ter en conta que estamos a falar dunha rúa moi transitada e sendo nun dos acesos o mercado de Teis”, inciden.

É por iso que a pasada semana a Asociación dirixiu un escrito á Concellaría de Fomento denunciando está situación e demandando a finalización das obras na rúa Purificación Saavedra. Segundo destacan, seguen sen recibir unha resposta a día de hoxe.

“Descoñecemos os motivos para a paralización destas obras desde hai tantos meses e cando as obras tiñan que estar finalizadas”. Desde a Asociación demandan o reinicio das obras para que estas podan finaliza “coa maior brevidade”.