O Bloque Nacionalista Galego (BNG) de Vigo criticou este luns que o Concello dedique a promover a lingua galega só un 5% do que gasta en bolsas de inglés, polo que pediu ao goberno de Abel Caballero que deixe de ser un axente “desgaleguizador” da maior cidade de Galicia, incumprindo de maneira “reiterada e deliberada” a ordenanza municipal de normalización lingüística.
“É necesario facer unha aposta decidida desde o público para alongar os espazos de uso do galego, para reverter o seu retroceso en Vigo e para garantir o dereito irrenunciable de todos os vigueses a poder vivir plenamente na nosa lingua propia”, reivindicou o concelleiro nacionalista, Xabier P. Igrexas, na véspera do Día das Letras Galegas.
Neste sentido, Igrexas censurou a “escasa” dedicación do Concello de Vigo a esta materia, con só 120.000 euros orzados para actividades da área de normalización lingüística, mentres que dedica 2,2 millóns de euros ao ano a bolsas de inglés.
“É un disparate intolerable”, criticou o edil do BNG, que advertiu de que “non se poden seguir soportando decisións políticas que marxinan o idioma propio” de Galicia.
