O persoal da empresa Vitrasa, concesionaria do servizo de bus urbano en Vigo, vese “abocado á folga indefinida”, á espera de que a Comisión Tripartita Galega para a Inaplicación de Convenios Colectivos interveña no conflito, e despois de que finalizasen sen acordo os períodos de consultas e mediación abertos tras o anuncio da empresa dun ‘descolgue salarial’.

Os traballadores concentráronse este xoves novamente ás portas do Concello de Vigo para denunciar a intención da empresa de reducir un 30 % os seus salarios e ampliar a súa xornada de traballo anual, e volveron a criticar que o goberno municipal, que en plena pandemia prorrogou a concesión por cinco anos máis, non tomase medidas para pór fin á situación.

O presidente do comité, Imanol Arnoso (CIG), sinalou que a aplicación dese ‘descolgue’ será “inminente”, e que a Comisión Tripartita nomeará un árbitro que decida o futuro dos traballadores. En todo caso, apuntou, Vitrasa mantense nas súas intencións e non deu mostras de reconsiderar a súa decisión, que xustifica por un risco de quebra económica.

Respecto diso, Arnoso reiterou que “as contas non cadran” e que “o primeiro que debería facer o Concello” é solicitar unha auditoría independente sobre Vitrasa. Como exemplo, explicou que, habitualmente, cando a empresa compra novos vehículos imputa ese gasto ao concepto de amortizacións a longo prazo, mentres que nas últimas contas “méteno nos gastos anuais”.

A xuízo do presidente do Comité, o Concello “debería rescatar a concesión” e advertiu de que as perdas provocadas pola pandemia no bus urbano “non xustifican” que Vitrasa “queira sacarlle o diñeiro aos seus traballadores e a todo o pobo de Vigo”

Na mesma liña, o vicepresidente do Comité, Fernando Pérez (USO) insistiu en que “non só falamos de recorte de salarios”, senón que a empresa pretende ampliar en 86 horas ao ano a súa xornada de traballo. “Imaxinamos que o recorte de salarios será a partir da próxima nómina (…). No momento en que se nos quite un duro, imos á folga, iso témolo claro”, resolveu.

ABEL CABALLERO

O alcalde Abel Caballero asegurou que “aplaudirá” á Xunta de Galicia se paraliza o conflito en Vitrasa, no marco da Comisión Tripartita Galega para a Inaplicación de Convenios Colectivos. O rexedor asegurou que o Concello apoia os traballadores.

A pesar de ser unha concesionaria municipal, Abel Caballero volveu  apuntar cara á Xunta de Galicia para buscar unha resolución ao problema, despois de que a empresa anunciase que se quere descolgar do convenio e reducir ata un 30% os soldos dos traballadores.

Segundo o razoamento do alcalde, na Comisión Tripartita o Concello non está, pero si o Goberno galego, onde podería paralizar o nomeamento dun árbitro que decida o futuro dos traballadores, alegando que hai que agardar a que se resolva o contencioso-administrativo sobre o tema, que será “rápido”. Os sindicatos tamén votarán en contra, o que permitiría a súa paralización.

“Non se pode facer que paguen os traballadores cunha parte importantísima de diminución do seu salario”, criticou Caballero, instando o Executivo galego a realizar esta acción, a cal sería “aplaudida” polo propio alcalde.

CRÍTICAS AO GOBERNO LOCAL

Pola súa banda, os portavoces municipais de Marea de Vigo e BNG, Rubén Pérez e Xabier Pérez Igrexas, que participaron na concentración dos traballadores, criticaron a “inacción” do goberno local ante este conflito e reclamaron o rescate da concesionaria.

Rubén Pérez advertiu de que a empresa recibiu o ano pasado 21 millóns de euros en subvencións e que “ten prestados varios millóns” a outras empresas do grupo Avanza, o que supón un “quebranto patrimonial dos recursos dos vigueses, para xustificar que a concesión non é rendible”. “O mellor que pode pasar é que crebe Vitrasa e se rescate a concesión para sacala como servizo público municipal”, incidiu.