O exboxeador Roberto Domínguez atópase detido desde este luns tras ser interceptado pola Policía Nacional en Vigo como presunto autor dun roubo con intimidación.
Segundo informaron fontes policiais a Europa Press, os feitos tiveron lugar na contorna da Praza da Miñoca, na cidade olívica, durante a tarde deste luns.
As vítimas serían un grupo de mozos aos que Domínguez lles pediu diñeiro en plena rúa, segundo as mesmas fontes.
Este suceso únese aos protagonizados polo exboxeador nas últimas semanas, despois de que fose arrestado en varias ocasións. A primeira delas tras fuxir da Policía e meterse na auga na praia do Vao despois de vulnerar unha orde de afastamento da súa exparella.
Catro días despois, Roberto Domínguez era detido por causar danos no depósito municipal de vehículos e por atentado contra a autoridade tras tentar atropelar un axente da Policía Local.
