Un mozo, E.M.G. de Vigo e 18 anos de idade, foi detido na cidade olívica na madrugada do pasado sábado tras agredir á súa exparella na zona da rúa Areal.
Tal como informou a Policía Local, os feitos ocorreron ás 05,30 horas, cando axentes que se atopaban patrullando polo lugar observaron un tumulto de persoas aproximándose a unha parella e visualizaron como un home cuspía a unha muller na cara e lle daba unha labazada.
Ao decatarse da presenza policial, o aludido iniciou unha fuxida, sendo abordado por un dos funcionarios. Namentres, outro axente entrevistouse coa vítima, de 20 anos de idade.
Ela manifestou que rompera a relación co mozo había seis meses, tras dous anos de duración. Con todo, estaba cansa de sufrir acoso constante por parte do home tras esa decisión. Ese día coincidiron pola zona e el agrediuna.
Por iso, procedeuse á detención do mozo pola suposta comisión dun delito de violencia de xénero.