O conselleiro de Medio Rural en funcións, José González, tendeu a man ao Concello de Vigo para deseñar de forma conxunta un “anel verde” que sirva para pór en valor os montes da contorna da cidade e para avanzar na prevención de incendios forestais.

Así o sinalou no acto de celebración do 25º aniversario da Mancomunidade de Montes de Vigo, ao que asistiu acompañado polo director xeral de Planificación e Ordenación Forestal, José Luís Adoito.

No acto, aproveitou para pór en valor os preto de 1,4 millóns de euros investidos polo Executivo galego no seu Plan de acción do monte periurbano de Vigo, programado tras os lumes forestais de outubro de 2017.

Así mesmo, José González instou ao Concello de Vigo a que se some ao traballo conxunto e á colaboración institucional, incorporándose ao convenio de protección das aldeas ao que xa están adheridos un total de 273 consistorios galegos, xunto coa Xunta, a Federación galega de municipios e provincias (Fegamp) e a empresa pública Seaga.

Nesa liña, aseverou que o Goberno galego, a Mancomunidade e o propio Concello deben ser capaces de formar ese tándem que permita implantar un monte periurbano que sirva de modelo para toda Galicia.