Un mozo, R.B.E.M. de Portugal e 27 anos de idade, foi detido en Vigo por segunda vez en tres días tras agredir á súa exparella en plena rúa, sobre a cal tiña unha orde de afastamento. Tal como informou a Policía Local, os feitos ocorreron na madrugada deste pasado martes, cando un veciño contactou cos axentes tras ouvir os berros de auxilio dunha muller pasadas as 04,30 horas na Avenida das Camelias.
Unha vez no lugar, os actuantes atopáronse cunha muller, de 36 anos de idade, que manifestou “moi nerviosa” que acababa de ser agredida pola súa exparella. Os axentes interceptaron ao home cando se dirixía a Praza América. El mesmo relatou que minutos antes se cruzou coa súa exparella que ía acompañada doutro home e que o increparon, recoñecendo que a agrediu e que lle constaba unha orde de afastamento sobre a mencionada muller.
Por iso, os axentes comprobaron esa información, constando en vigor unha prohibición de aproximarse a menos de 200 metros da vítima, ditada polo Xulgado de Violencia sobre a Muller número 1 de Vigo. Ademais, decatáronse de que o mozo fora detido dous días antes como presunto autor dun delito de quebrantamento de condena, ao saltar unha orde de afastamento con respecto á muller, coa que foi sorprendido durmindo nuns xardíns da cidade de Vigo.
