A Dirección Xeral de Saúde Pública da Consellería de Sanidade comunicou este sábado que se detectou na área sanitaria de Vigo o terceiro caso de hepatite aguda infantil de orixe descoñecida en Galicia.
Segundo informou Sanidade, trátase dun caso do mes de febreiro e a día de hoxe a persoa atópase “asintomática e coa analítica normalizada”. Así mesmo, a Consellería sinalou que o sistema sanitario galego permanece alerta para detectar máis posibles casos.
Neste sentido, a semana pasada a Xunta comunicou que o sistema de vixilancia epidemiolóxica de Sanidade detectou un primeiro caso no mes de xaneiro, sendo a evolución do paciente positiva. Ademais, trasladaron a existencia doutro caso que se está tratando na actualidade e que evoluciona favorablemente.
